Carmen Rúa pidió más sofitu pal asturianu en secundaria

La conceyala de Educación y Llingua Asturiana Carmen Rúa acudió ayeri a la presentación de l'Axenda Escolar qu'edita la Oficina de la Llingua por segundu añu y que tien anguaño una tirada de 1.500 exemplares. La conceyala d'IX-BA apurrió nel actu datos sobre la escolarización del asturianu nel conceyu. Aparte de la universalización de la ufierta d'asturianu en primaria, la conceyala destacó que en secundaria son 705 los alumnos que van dar asturianu nesti 2005-2006, los más d'ellos en centros públicos más un grupu del San Llorienzo, ún de los centros de la rede concertada. Dase la circunstancia de que ye la primer vegada qu'esti centru va tener grupu d'asturianu en secundaria dempués de que l'añu pasáu, énte la presencia de 14 estudiantes que pidieren francés como optativa y otros 12 que pidieren asturianu, en cuenta de facer dos grupos, la Conseyería púnxo-yos francés a los 26 escolinos.

Continúa asina la tendencia a la xuba na escolarización del asturianu en secundaria en Xixón, que pasare de los 420 estudiantes matriculaos n'asturianu nel cursu 2003-2004 a 624 nel 2004-2005, lo que nun quitó pa que Rúa pidiere mayor compromisu de les autoridaes asturianes col enseñu del asturianu, cargando la culpa del pocu sofitu institucional pa cola asignatura a los sos socios de gobiernu del PSOE.