Xega ve resquiebra nel PP nel tema del matrimoniu homosexual

El colectivu Xente Gay Astur (XEGA) reaccionó énte l'anuncia del portavoz del PP Eduardo Zaplana que confirmó la presentación por parte del partíu conservador d'un recursu d'anticonstitucionalidá contra la llei que dende esti mesmu añu permite los matrimonios ente persones del mesmu sexu.

El coordinador de Xega, José Manuel González, declaró énte esta anuncia a la cadena SER que nun-yos estrañaba en Xega que'l PP diere esti pasu, sobremanera en viendo la fuerza d'organizaciones como l'Opus Dei, al que Xega ve tres de la organización de les manifestaciones "al favor de la familia" pero sí llamó l'atención sobre les diferiencies qu'ello abrió nel PP ente los sectores más reaccionarios y l'aperturismu que defende oficialmente Mariano Rajoy. La engarradiella interna ente sectores del PP tamién tendría que ver pal responsable de Xega cola presentación d'esti recursu d'inconstitucionalidá, que busca l'enfrentamientu de la estaya más conservadora del PP cola más aperturista, na que taríen xente como Ruiz Gallardón o Celia Villalobos, ello dempués de que dientro de les files del PP se diere a conocer públicamente un coectivu de gais y lesbianes militantes del partíu que tan preparando acciones de protesta contra la presentación del recursu.