La cabeza de Nacho García da-y tres puntos a un probe Uviéu

Entamó mal el partíu pal equipu azul qu'al primer minutu de xuegu yá perdía por 0-1. 93 minutos necesitó pa despertar y rematar una victoria importante que pon al equipu na zona alta de la tabla.
Menos d'un minutu de xuegu necesitó Calvillo pa roba-y un balón a la defensa y marcar de tiru dende fuera l'área, un gol que diba marcar el desendolque del partíu. L'equipu uvieín intentólo con gana pero siempre ensin cabeza nin criteriu nel centru'l campu onde un home de la importancia de Michu nun tuvo a l'altura a que nos tien avezaos. Énte la falta de coordinación de les llinies azules, un Palencia bien asentáu nel campu y que nunca nun dio facilidaes en defensa tuvo delles contres nes que se presentó en superioridá ante la defensa azul pero nun foi a rematar nenguna delles. Esta falta de definición y quiciabes tamién d'ambición del Palencia que siempre foi superior vieno a costa-y el partíu al final. Nun tenía bona pinta'l partíu y l'Uviéu solo xugaba con balones en llargu a los que poca rempuesta podíen dar los homes d'arriba, asina foi que namás surdió dalguna ocasión en cuntaes entraes per banda, llegando nun córner frutu d'una d'estes entraes el gol de Michu que l'árbitru anuló por falta al porteru.


La segunda parte arrancó cola novedá del cambiu de ropa del árbitru, que tuvo los primeros 45 minutos con una camiseta mariella que se confundía cola de los palentinos, y cola entrada d'un Jandro que xugaba los primeros minutos de la temporada. Agradeció l'equipu les ganes y calidá del canteranu y d'una falta sobre elli vieno l'empate azul. J. Carrera sacó la falta, N. Rodríguez peinó y N. García remató nun gran cabezazu p'atrás. Lo meyor vieno nel tiempu de prollongación, con tres minutos sobre'l 45 Jandro mandó un gran centru al área que Nacho García remató de forma maxistral al fondu la rede palentina.
Final feliz pa un partíu de superioridá del Palencia al que l'Uviéu solo pudo vencer gracies a una gran dosis d'eso que se llama comunmente "potra" y l'aciertu rematador de Nacho García. En definitiva, tres puntos de gran importancia enantes de la visita a Miramar d'un Real Uviéu que va deprendiendo a sufrir na categoría pero que tien qu'ameyorar muncho'l so xuegu.