IX-BA-LV propón que l'Estatutu recueya la Oficialidá

"El voceru del grupu parlamentariu Izquierda Xunida-Bloque por Asturies-Los Verdes, Jesús Iglesias, sorrayó momentos dempués de celebrase l'aconceyamientu de los miembros de la Ponencia Estatutaria de la Xunta Xeneral del Principáu, que la propuesta estatutaria del so partíu pasa pola inclusión de la llingua asturiana en términos d'oficialidá, asina como la Carta de Drechos sociales y civiles de los asturianos y asturianes.

Dende'l puntu de vista del so grupu parlamentariu, la reforma tien d'incorporar el reconocimientu del asturianu como llingua oficial ""como patrimoniu del conxuntu de los asturianos dende la perspeutiva de que namás con esi reconocimientu se garantiza'l futuru de la llingua de nueso"".

Pal voceru d'IX-BA-LV, tamién ye necesario que'l nuevu testu tenga unos principios inspiradores pa l'acción de Gobiernu, que llenden el tarrén nel que los Gobiernos que vengan darréu tengan de movese pa diseñar un modelu de sociedá compartida polos más de los ciudadanos; nueves competencies pa resolver los problemes de la xente; y una estructura política ensin les torgues que tien anguaño la disolución de la cámara, ente otres propuestes.

Pa Iglesias l'Informe Xeneral ye un ""bon documentu"" que tien de permitir que toles fuercies polítiques pongan enriba la mesa les propuestes y los conteníos que'l nuevu Estatutu d'Autonomía d'Asturies tien de tener. Por embargu, sorrayó que ""sería meyor qu'Asturies yá tuviere un Estatutu dende hai un añu y mediu como delles comunidaes"". ""Nun podemos siguir perdiendo más tiempu y cuerre priesa qu'Asturies tenga un Estatutu que compense la desventaya cola que participamos na configuración del Estáu de les Autonomíes"".

Según Jesús Iglesias, ""Asturies nun pue siguir siendo una comunidá de segunda"". Poro, caltién que l'oxetivu de la reforma tien de ser asitiase ""al empar que'l restu de llugares que ficieron un apueste por tener mayores competencies pa nun ser menos qu'ellos, y pa que l'Estatutu seya útil pa resolver los problemes de la ciudadanía""."