Trabe espubliza un llibru nuevu pa la ESO

La editorial Trabe saca a la cai un preséu nuevu pal
enseñu del asturianu. Esti llibru ta dientro de la colección
PICOS que quier dotar a tola ESO de material d'estudiu y trabayu.



El llibru, que cunta cola coordinación pedagóxica de Severino
Antuña, lleva'l nome del picu más altu de los montes
asturianos, Torrecerréu, y va dirixíu a los alumnos de cuartu de
la ESO. El llibru de testu va acompañáu d'un cd con grabaciones
de situaciones cotidianes de la fala y llectures lliteraries, como yá
pasó nel númberu anterior d'esta colección dirixíu
a alumnos de 3º de la ESO. El llibru vien estructuráu n'ocho
llecciones, y en caúna d'elles trátense temes de
comunicación, xunta cuestiones que nun tienen que ver necesariamente
cola llingua o la lliteratura. Amás el llibru tamién incluye un
par de proyectos de trabayu, ún sobre la ría de La Villa, y otru
un comentariu de testu d'un poema de Xuan Xosé Sánchez
Vicente.



La editorial tamién ufierta de baldre a tolos profesores
interesaos, un Cdrom interactivu que sirve de guia d'utilización de
testu del llibru de terceru (Llambrión), mientres s'acaba de facer la
guia interactiva pa esti Torrecerréu de cuartu de la ESO.


Esti llibru sal al mesmu tiempu qu'otru pa la ESO qu'edita Vtp, dambos ficiéronse gracies a la subvención convocada pola
Conseyería de Cultura, Oficina de Política Llingüística.