La Oficina de la Llingua d'Avilés ábrese a los ciudadanos

La Oficina de la Llingua avilesina iguó unos horarios
d'atención al públicu p'atender a les duldes y propuestes de los
ciudadanos. Amás la oficina va entamar unos cursos d'asturianu,
amás d'iguar un archivu.



La oficina de la llingua d'Avilés va tar abierta al
públicu de 11:00 a 13:00 hores na primer planta de la Casa de Cultura
-plaza Álvarez Acebal-. Esti mesmu horariu va ampliase tamién
peles tardes -de 18:00 a 20:00 hores- a partir del mes d'ochobre. El llabor de
la oficina tamién va centrase en dos cursos d'asturianu. Estos cursos
van ser d'introducción, y ún d'ellos va dir dirixíu a
adultos en xeneral, y otru va tar acutáu pal personal de
l'alministración pública avilesina. Inda nun se saben les feches
nes que se van poner estos cursos, pero dende la oficina aseguren que
d'equí a la vuelta de poco díes yá podrán dase
más datos.



Dende la oficina tamién tán trabayando n'iguar un archivu
d'asociaciones y particulares que trabayen pola dignificación de la
llingua y cultura d'Asturies, colo que dende la política
llingüística avilesina animen a pasar pelos sos locales p'apurrir
información.