La coordinadora ecoloxista entruga al Principáu polos campos de golf

La coordinadora ecoloxista d'Asturies unvió una instancia a la Conseyería de Medio Ambiente col envís de conocer cuála ye la postura del Principáu énte los proyectos de campos de golf n'Asturies.

La organización ecoloxista asturiana amosó ayeri la so preocupación porque'l Principáu "nun presenta nenguna preocupación énte l'argayu de proyectos de campos de golf n'Asturies". Ello ye que la Coordinadora Ecoloxista yá contabiliza 17 proyectos, "dalgunos d'ellos yá en trámite, y que van ocupar un mínimu de 300.000 m2 caún". Dende la coordinadora quieren recordar que nun se ta falando namás de les instalaciones deportives en si "sinón de complexos urbanísticos con estructura de nucleu habitáu, onde va haber viviendes, instalaciones hosteleres y centros comerciales". Nesti sen la preocupación de los ecoloxistes aumenta al observar que'l Principáu "nun amuesa, de momentu, la menor de les preocupaciones, quitando'l detalle de que sepamos de la so existencia pa oponese a la barbaridá, propia de décades qu'inxénuamente creyíemos llonxanes, de construyir instalaciones hosteleres nel cantu de los cantiles del cabo Vidíu".

La coordinadora quier saber si'l Principáu realizó yá dalgún estudiu o si tien intención d'ordenar toes estes actuaciones urbanístiques col envís d'evitar daños al entornu, y facer que'l desarrollu territorial vaiga pel camín de los sostenible. Amás, según la coordinadora, el Principáu amosaría una llinia coherente cola "postura mantenida pol propiu Principáu dende los años ochenta, frutu tamién de la voluntá de la sociedá asturiana, qu'apostó por un turismu diferenciáu, de calidá, non masivo y respetuosu col mediu ambiente, como seña d'identidá énte otros modelos que tán más que desarrollaos y esplotaos dientro del restu del Estáu". Por eso dende la coordinadora consideren que'l Principáu nun taría atendiendo a les sos responsabilidaes si se namás que desixera'l correspondiente Estudiu d'Impactu Mediu Ambiental.