Mieres presenta una nueva edición de la Folixa na Primavera

"Mieres va celebrar el 18, 29 y 20 del mes que vien, la XIII Folixa na Primavera, una fiesta pensada como'l festival de música y cultura del Arcu Atlánticu, onde la música celta, con grupos de folk de prestixu internacional, la gaita, la comida asturiana y la sidra son la base d'un fin de selmana d'auténtica folixa. Asina quedó espresao pol Conceyal de Festexos y Facienda del Ayuntamientu de Mieres, Rafael Perdiguer, y el periodista asturianu Aurelio Argel.

Rafael Perdiguer señaló que nestos 13 años ""la Folixa de Mieres vien afitándose como ún de los grandes alcuentros del Norte d'España y, ensin dulda, d'Asturies, gracies al cartel que se presenta tolos años, con grupos musicales de proyección mundial. Asina pasaron per esti escenariu grupos y artistes como ""Gwendal"", ""Wolfstone"", ""Capercaille"", el perconocíu gaiteru irlandés ""John McSherry"", les fineses ""Värttina"", ""Tanahill Weavers"", ""Skolvan"", ""Flook"" o ""Gaiteiros de Lisboa"", los norteamericanos de ""Solas"" o los franceses de ""Mugar"" y de ""Mosaic"".... asina como xente de casa como ""Hevia"" y ""Llan de Cubel"", los gallegos Carlos Núñez y Cristina Pato o'l vascu Kepa Junquera.

Aurelio Argel faló de los grupos qu'esti añu diben tocar nel parque Xovellanos de Mieres, ""La Bandina"", ""Felpeyu"", ""Michael Mc Goldrick Band"" y el grupu irlandés ""Dervish"". El primeru en tocar será'l grupu ""La Bandina"", qu'abrirá'l programa de conciertos el 18 d'abril a les 11.00 de la nueche. Darréu, y yá entrada la madrugada, el grupu inglés ""Michael Mc Goldrick Band"" fairá un repasu pel repertoriu que lu fai ser ún de los músicos tradicionales más conocíos nel mundu. Na nueche del sábadu l'orde d'actuación será'l mesmu, en primer llugar la xente del país siguíos de los invitaos internacionales. Nesti casu será ""Felpeyu"" l'encargáu d'abrir una nueche que siguirá col conciertu de la formación irlandesa ""Dervish"".

Toles actividaes van tener llugar nel Auditoriu Central del Parque Xovellanos de Mieres, asitiáu nel centru la ciudá. Amás de los conciertos la XIII Folixa desarrollará delles actividaes a lo llargo la selmana, ente elles les conferencies al rodiu del folk y la música tradicional."