Fernando Alonso caltién la diferiencia nel mundial

Fernando Alonso acabó nel segundu puestu'l Gran Premiu de Turquía de Fórmula 1, una carrera na que l'asturianu tuvo que dáse énte la superioridá de los Mc Laren Mercedes, que ganaron con Kimi Raikkonen, que mandó'l Gran Premiu prácticamente dende l'entamu hasta la bandera a cuadros, sacantes los primeros kilómetros de la preba, nos qu'un sorprendente Giancarlo Fisichella foi a ponese líder col segundu Renault. Los coches grises diben tres d'un doblete que paecía inevitable cuando, a poques vueltes del final, el segundu McLaren de Juan Pablo Montoya tuvo un toque al doblar un coche con vuelta perdida. Ello y una pequeña salida de pista foi abondo pa que Fernando Alonso, que venía tres d'elli, lu adelantare y consiguiere una segunda plaza que val muncho en cuantes que d'esta manera Raikkonen namás foi a arrampuñá-y dos puntos na xeneral del campeonatu.

A falta de cinco carreres, Alonso sigue líder y tien venticuatro puntos de marxe sobre'l pilotu finlandés, l'únicu que-y pue quitar el campeonatu en cuantes que Michael Schumacher yá ta descartáu dafechu. La siguiente cita del mundial ye en Bélxica, nel circuitu de Spa, ún de los más espectaculares del mundial y la pista onde Alonso se confirmó como pilotu de categoría cuando corría na Fórmula 3.000, va yá d'ello cinco años.