Guillermo Ballina reafirma la importancia del asturianu na reforma estatutaria pa IX

Guillermo Ballina, miembru de la executiva d'Izquierda Xunida, declaró a Asturies.com que pa IX la oficialidá del asturianu sigue siendo una de les prioridaes.

Guillermo Ballina quixo dexar clara la postura de IX en rellación a l'inxerimientu de la oficialidá del asturianu na próxima reforma del estatutu y declaró a Asturies.com que "como aspiración d'IX la oficialidá ye irrenunciable, sicasí la nuestra capacidá pa conseguila o non dependerá de la dinamica política en que se desenvuelva'l procesu de reforma". D'esta manera, el dirixente d'IX salía al pasu d'informaciones apaecíes güei nel diariu asturianu "El Comercio" que daben por segura la renuncia d'IX a plantegar l'asturianu como materia irrenunciable na reforma del Estatutu d'Autonomía. Con too y con ello, Ballina aclaró que nun podía desmentir nada en cuantes que nun sabía "con quién toi polemizando porque nun sé quién fizo eses declaraciones, pero de toes maneres nun plantegamos una posición nin tan flexible nin cortante como la qu'apaez nesa información y preferimos nun falar en términos d'irrenunciable o renunciable".

Guillermo Ballina tamién quixo definir la posición que caltién nestos momentos el partíu no que cinca a esti tema, que "va tocase cuando s'abra la reforma estatutaria, y va ser una de les prioridades nel debate políticu d'IX en setiembre". Asina dende la dirección de IX consideren que "'hai qu'esperar a que se plantegue'l tema na conferencia política y d'ehí llevalo depués a la mesa de la reforma como ún de los temes fuertes nel nuestru posicionamientu". Ballina dexó bien claro que pel momentu "n'IX nin rebaxamos nin aumentamos les nuestres pretensiones históriques respecto a ello". De toes maneres el dirixente d'Izquierda espresó'l deséu de que "la FSA comprenda que se trata d'una oportunidá que nun podemos perder pa reconocimientu de la llingua y vamos intentar que lo entiendan asina".

Esta selmana, el Bloque por Asturies diere una rueda de prensa pa declarar que la organización asociada a IX nes pasaes elecciones autonómiques y tercer miembru del pautu de gobiernu nun diba firmar una reforma que nun contemplare la oficialidá y que se plantegaría la so salida del executivu en tal casu. Rafael Palacios, dirixente del Bloque, declaró énte les afirmaciones apaecíes na prensa que "nel Bloque tamos sorprendíos énte estes afirmaciones que nun sabemos exáctamente d'au vienen y en cualquier casu nun nos consta de qu'IX tenga pensao renunciar a la oficialidá na reforma del estatutu".