62 asturcubanos visiten el país gracies a la operación señaldá

En Cuba vive una comunidá d'aproximadamente dalgo más de tres mil descendientes d'emigrantes asturianos de segunda y tercera xeneración. Anguaño, gracies al programa "Señaldá" bien de xente d'esti colectivu, especialmente aquellos que tienen menos posibles económicos, disfruta d'unes vacaciones pagues de quince díes n'Asturies. A lo llargo de los sos 14 años d'existencia, el programa "Señaldá" del que se beneficiaron anguaño 62 asturcubanos, ta a puntu de llegar al cómputu total de 1.000 beneficiarios.

Amás de recuperar rellaciones familiares que taben perdíes, permitiendo que vuelvan a alcontrase distintes xeneraciones y ramales de bien de families, el plan ayuda tamién a caltener la rellación cultural ente Asturies y la so emigración, ello arriendes de cumplir una función asistencial pa con un colectivu dacuando con carencies graves en materia de salú.