El Gobiernu quier llevar internet a los pueblos d’Asturies

El viceconseyeru d'Alministración y Presupuestos Públicos Luis Iturrioz adelantó ayeri na Feria de Muestres de Xixón los datos del proyectu "E-Asturias" que quier llevar conexón a la rede internet a los pueblos asturianos nel añu 2008. Iturrioz adelantó que ta preparándose la concesión de los contratos a les operadores que y que'l Gobiernu asturianu va subvencionar si ye preciso, a les empreses pa que los precios de la conexón na zona rural asturiana queden igualaos colos de les ciudaes.

Los medios pa ello van ser tolos que se precisen: ADSL, satélite o freba óptico, emplegándose ún o otru dependiendo de la orografía y les dificultaes del llugar p'apurrirun anchu de banda d'ente 1 y 2 mb. L'oxetivu del plan ye llegar nel añu 2007 al 43 por cientu de ciudadanos particulares conectaos y al 95 por cientu de les empreses asturianes de más de diez trabayadores, ello aparte de potenciar l'alministración electrónica.

Yá nel mes de marzu'l Gobiernu asturianu anunciare que diba collaborar con un plan de la Secretaría d'Estáu de Telecomunicaciones y pa la Sociedá de la Información (SETSI) pa desaniciar les torgues nel accesu a internet de banda ancho qu'esisten nel estáu y universalizar dafechu l'accesu en condiciones a la rede pa tolos ciudadanos nel 2008. D'aquella anunciárase que les primeres alxudicaciones pa dar serviciu de banda ancho en lugares onde nun lo haya diben facese en xunetu d'esti añu.

La posibilidá de contratar banda ancho llega anguaño al 92,2% de la población asturiana. Queden 83.749 habitantes que nun puen contratala y un númberu indetermináu d'ellos tienen amás llinies telefóniques TRAC que nun permiten la conexóna la rede. Existen anguaño n'Asturies 22 conceyos nos que ye imposible dafechu acceder a internet con banda ancho, mientres que nun total de 46 hai bien de parroquies y llugares dende les que tampoco ye posible la conexón.