Echa a andar mañana'l Festival Intercélticu de Tapia

Con munches aportaciones foriates nel so programa arranca
mañana l'intercélticu de Tapia. N'Asturies.com ponemos a
disposición de los sos llectores el programa completu pa consultalu en
cualesquier momentu.



Mañana miércoles 17 entama'l festival a eso de les 19:00
hores coles actuaciones de la banda bretona
"Bagad Landerneau",
la banda asturiana de Proaza, Santu Adrianu y Teberga
Camín
de Fierru; los escoceses "Williamwood Pipe
Band", "Corisco" de Galicia, y el grupu alemán
"Volkstanzgruppe".
Esi mesmu día, amás de pa la música, tamién va
haber sitiu pa la divulgación de la cultura asturiana. Ello ye que va
proyectase a les 20:00 hores un videu sobre los horros y paneres d'Asturies, y
a les 20:30 hores va haber una conferencia col títulu "Los rabeles
n"Asturies (Les Bandurries)" a cargo de profesor de la escuela de
música de Tapia Jose Ángel Llaneza. El día va finar con
una verbena tradicional asturiana.



A lo llargo la selmana va repetise l'esquema de programa que podemos ver
el primer día, actividaes de divulgación, actuaciones de bandes
de gaites, talleres de baille y nueche folk pa poner puntu y final a cada
día. Asina podemos rescamplar les actuaciones de grupos como "Save
the Dragons" d'escocia, o los astur-arxentinos "Folixa". Nes
nueches folk tamién vamos poder ver a los asturianos "Rum" y
los gallegos "Xistra de
Coruxo", los conocíos y potentes canadienses "Les
Batinses", los asturianos "Llangres" y los escoceses
"Breizh Le Cam".



Tou esti programa pue consultase con detalle d'horarios y
llugares calcando nesti enllace onde Asturies.com ufierta'l programa completu
en formatu JPG.