El CMPA denuncia la mala salida llaboral de la mocedá asturiana

Un informe del Institutu Español de la Mocedá (INJUVE) rescampla l'alta tasa de temporalidá, la revesosa trayectoria profesional y la precariedá nel emplegu de la mocedá en tol Estáu Español. Asturies apaez nel informe como una de les comunidaes onde'l tiempu mediu p'alcontrar trabayu n'acabando los estudios pasa de los trenta meses, un plazu que nel casu de los non llicenciaos pasa de los cinco años

L'informe, entituláu "Aspectos salariales de los Trabayadores Mozos" vien coles firmes d'Álvaro Hidalgo Vega de la Universidá de Castiella La Mancha y de Santiago Pérez Camarero, de la Universidá Carlos III de Madrid y rescampla l'esmolecedor panorama llaboral de la mocedá. Rebeca Rodriguez, presidenta del Conseyu de la Mocedá del Principáu d'Asturies (CMPA), dio a conocer esta mañana esti informe del que sacó en conclusión que se precisen "polítiques más ambicioses pa combatir la temporalidá y precariedá llaboral ente la mocedá"

La presidenta del CMPA diz que "los índices de contratación temporal son insostenibles y que provoquen trayectories profesionales que van al debalu como se conoz polos sos historiales llaborales, que presenten una riestra de contratos curtios en munches empreses distintes nel casu de los que son a entrar a la rueda del mercáu llaboral." La presidenta del CMPA llamó al gobiernu a facer realidá'l Plan d'emplegu Xuvenil al que se comprometiere cuando se fexo la valoración oficial de los dos primeros años de la llexislatura. El CMPA apunta a qu'esti plan ha contemplar la contratación de xente mozo por parte de l'alministración y la empresa pública y potenciando la creación d'emplegu cualificáu pa echar a andar planes de I+D+I, y programas vinculados a la industria mediuambiental y de xestión cultural, too ello con atyención especial a les cuenques y conceyos rurales.