Valledor pide-y al Gobiernu Central que torne a negociar colos Sindicatos de Xusticia

"El diputáu nel parlamentu asturianu y voceru de xusticia de la coalición IX-BA-LV, Javier García Valledor, anunció la presentación per parte de la so formación, d'una proposición non de llei na qu'invita al Gobiernu Central a que torne coles negociaciones colos sindicatos representativos de l'Alministración de Xusticia que lleven más d'un mes en fuelga pa vindicar meyores salariales.

Valledor fizo estes declaraciones nos ""desayunos solidarios"" qu'organicen los trabayadores en fuelga na sede de l'Audiencia Provincial. Ellí sorrayó que les vindicaciones de los trabayadores son ""más que razonables porque, básicamente, lo que quieren ye averar les sos retribuciones a les que reciben el restu de compañeros nes demás comunidaes con competencies tresferíes"".

Dende'l so puntu de vista nun tien xacíu siguir coles diferencies salariales de 500 euros al mes ente estos trabayadores y los sos compañeros d'otres comunidaes autónomes. ""Ye increíble que los actuales responsables de la Conseyería de Xusticia, cola conseyera de cabezalera, nun fueren capaces a dicir nada sobre esta situación, nin una pallabra, como si nun fuera con ellos""."