Concursu lliterariu en L.luarca

El certame de poesía Nené Losada Rico, qu'organiza l'asociación de muyeres Valdés Sieglu XXI , tien abiertu'l plazu de presentación de poemarios dende'l 1 de setiembre al 1 d'ochobre. Esti concursu de poesía de L.luarca, villa onde tamién se celebra'l certame "Fernán Coronas" tien dos modalidaes, una en llingua castellana y la otra en llingua asturiana, y ta abiertu a poemarios inéditos con un mínimu de 275 versos y un máximu de 500 versos. Carlos León, presidente de l'Asociación de Poetes Valdesanos, los profesores José Antonio Pérez y Juan José Alonso, Ana Suárez, presidenta de Milenta Muyeres y l'escritor Gonzalo Moure van facer el xuráu pa la categoría en castellanu, mientres que'l xuráu de llingua asturiana van facelu los escritores Xuan Bello, Antón García, Consuelo Vega, Anxel Alvarez y la mesma Nené Losada Rico, decana de les lletres n'asturianu y que ta acabante de recibir la medalla de plata d'Asturies.