Consuelo Vega: "La cantera pal esparcimientu de la llingua ta na reciella"

"El vocalista del grupu Nuberu, Chus Pedro, y el grupu de neñes y neños Xentiquina, van ufiertar a partir de la selmana que vien y hasta finales de cursu, una serie de conciertos didácticos en diferentes centros educativos asturianos. De la mesma manera, la escritora asturiana Montserrat Garnacho, actuará nos colexos con delles sesiones de cuentacuentos.

Estes actividaes formen parte del programa d'espardimientu de la llingua y cultura asturiana, nos centros d'Educación Primaria y Secundaria, puestu en marcha poles conseyeríes de Cultura y Educación. Como yá adelantáremos nesti mediu, el programa foi presentáu esti vienres pola Directora Xeneral de Promoción Cultural y Política Llingüística, Consuelo Vega, y el Director Xeneral d'Ordenación Académica, Luis Enrique García Riestra.

Nel actu tuvieron presentes Chus Pedro, y el director de Xentiquina, Nacho Fonseca. Chus Pedro va ser l'encargáu del ciclu 'sones d'Asturies', empobináu al alumnáu de Secundaria. Según esplicaron, l'actividá ta basada nun ""conciertu didácticu, nel que de lo que se trata ye de cantar temes tradicionales asturianos n'asturianu, enseñando-yos a los alumnos y alumnes lo que ye una vaqueirada, una tonada, una habanera..."", asina mesmo esplíquense ""los compases, el ritmu, lo que ye una melodía"". El cantautor yá ufrió un ciclu de 15 conciertos asemeyáu nel cursu pasáu. Foi ""una esperiencia mui guapa, dalgo que merecía la pena porque la mocedá, amás de cantar y atender a les esplicaciones, participaben nos cantares, salíen y cantaben con nós, y hai casos de rapazos de 14 años cantando tonada o tocando la gaita"".

Nel mesmu sen espresóse Nacho Fonseca, quien sorrayó que ""se trata d'una clase de música, pero mui diferente a les cuatro paredes del aula"". Al empar dixo que taba ""mui satisfechu"" al considerar que los más de los asistentes a les sos actuaciones conocen tolos cantares. Xentiquina va ufiertar actuaciones pa clases de Primaria.

Caún de los grupos participará nun total de 10 sesiones pa 21 institutos. Amás, Montserrat Garnacho ufiertará otres 21 sesiones de cuentacuentos en diferentes centros d'Educación Primaria.

Nel planu musical, Consuelo Vega esplicó que ""los neños que deprienden los cantares de Xentiquina, dempués deprienden los de Chus Pedro y siguen lleendo n'asturianu"" al mesmu tiempu ""sabemos que la cantera pal espardimientu del asturianu ta na reciella"".

D'otru llau, Luis Enrique García Riestra aprovechó la ocasión pa recordar les midíes d'apoyu a la llingua asturiana desarrollaes pol Gobiernu autonómicu nel ámbitu educativu. Asina señaló la espublización de los currículos, la convocatoria de sovenciones pa la edición de llibros de testu, qu'esti añu va ampliase a los cursos de cuartu, quintu y sestu de Primaria. Tamién recordó los planes de normalización y señaló l'aumentu de profesores de l'asignatura dende'l 2005 hasta esti momentu de 153 a 170 en primaria, y de 64 a 72 en secundaria. No que cinca a los alumnos, sorrayó que nel mesmu periodu, ""tamién aumentó'l so númberu"". ""Pasamos de 14.000 a 16.00 en Primaria, y de 3.000 a 5.00' en Secundaria""."