Taller pa monologuistes en Candás

El Centru Cultural Teatru Prendes de Candás, entama'l II Taller d'Aniciu al Monologuismu Cómicu Asturianu. El profesor encargáu de dar esti taller va ser el monologuista, actor, cuentacuentos y periodista Carlos Alba, más conocíu pol nome de Cellero. El taller, de 15 hores repartíes en clases de tres hores caúna del 22 al 26 d'agostu, tien abierta la posibilidá d'apuntase hasta'l 17 d'Agostu llamando al Centru Cultural Teatru Prendes de Candás de llunes a xueves de 10,30 a 13,30 hores nel Tlf./Fax: 985871021. El preciu d'esti taller ye de 24€ y en finando'l mesmu entregaráse certificáu d'asistencia, incluyéndose nel preciu entraes pa les funciones del XV Salón de Teatru Costumista Asturianu de Candás qu'entama'l 18 d'agostu nel Teatru Prendes de Candás.

El taller va tener una metodoloxía práutica, tratando de formar intérpretes de monólogos cómicos asturianos con recursos pa interpretar testos clásicos pero tamién pa facer hestories modernes, afalando'l rescate de la tradición oral y la so adautación escénica en socedíos, cuentos, chistes o comentarios. El programa del taller ye estensu, tratando puntos como l'analís activu del testu, el material del monologuista, la espresión corporal, l'audición y analís de monologuistes, respiración y impostación, la interpretación, recoyida de material oral y igua de testos.
Amás d'esti II Taller d'Aniciu al Monologuismu Cómicu Asturianu y del XV Salón de Teatru Costumista Asturianu, el Centru Cultural Teatru Prendes tamién entama nesti mes d'agostu la tercer edición de los Premios Aurora Sánchez de Teatru Costumista, y el tercer Ciclu Musical Fechu n'Asturies, que va tener el so puntu fuerte col Nueche Celta del 20 d'agostu.
Más información na web de Cellero