CEPESMA ve nicios del calecimientu del planeta na costa asturiana

El Centru d'Estudiu y Protección de les Especies Marítimes (CEPESMA) diz qu'a lo llargo d'esti branu van apaeciendo na costa asturiana bien d'exemplares d'especies que viven nel árticu y que'l fundimientu de los polos podría carretar hasta agües más al sur.

L'apaición va pocos díes d'un regalecus glesnes de cerca de 2 metros que daba les boquiaes nun pedreru de Candás pieslla pel momentu la llista de cuatro exemplares que lleven apaecíos d'esta especie na costa asturiana a lo llargo del branu. Según los técnicos del CEPESMA, la presencia d'estos animales tienen muncho que ver coles corrientes de los mares del norte y del árticu que lleven a rastru l'agua frío del norte pa contra l'Océanu Atlánticu. Estes corrientes, que taríen en procesu de disgregación por efectu del calentamientu del planeta, echaríen pa contra'l sur mases d'agua frío que vien del fundimientu progresivu del casquete polar, llevando con elles estes agües exemplares d'especies que dende va siete años p'acá los especialistes del CEPESMA dicen que yá tan avezaos a ver pela costa asturiana, casu de delles especies de foca como la foca gris, la foca común o la foca de cascu, esta última ártica dafechu.

Solo esti branu'l CEPESMA yá lleva vistes siete foques comunes, una situación que la organización califica d'anómala, lo mesmo que les variaciones de temperatura que se rexistren na costa asturiana y que vendría dada tamién pola llegada de mases d'agua frío del norte. Les mediciones coles que trabaya'l CEPESMA, que son les que-yos apurre'l personal de salvamentu, falen de cambeos de temperatures medies nel agua de 21-22 graos a 17-18 nel espaciu de tiempu de dos díes, datos qu’aseguren que nun correspuenden coles oscilaciones normales.