L’occidente prende en medio de l’alerta pol calor

Los montes del país sufrieron ayeri una riestra d'incendios que dañó enforma los conceyos del occidente, rescamplando les 50 hectarees que quemaron en Degaña

Más de 30 fueos dañaron ayeri la xeografía asturiana, según datos del serviciu 112 Asturies, que recibió un total de 44 avisos. Nengún d'ellos tuvo una gran estensión, sacantes el que se rexistró en Degaña y nel que quemaron 50 hectárees de monte, quedando tolos demás llendaos a superficies d'ente seis y ocho hectárees gracies a un intensu llabor de los retenes de bomberos. Tolos fueos que prendieron ayeri tuvieron llugar nos conceyos del centru y del occidente del país, espardiéndose les llaparaes per dellos puntos de Gozón, Castrillón, Corvera, Llanera, Uviéu, Grau, Cuideiru, Ayer, Miranda, Tinéu, Ayande y Somiedu. Son precisamente los conceyos del suroccidente asturianu los que concentren, como tolos años, el mayor númberu de fueos y tamién los más peligrosos. L'alerta pol calor, que prevé temperatures d'hasta 33 graos n'Asturies, y la falta d'aire asitia'l país nos peores díes del añu no tocante al riesgu de fueu.