IX-BA-LV diz que nun va permitir un estatutu "de segunda"

"Los grupos políticos mayoritarios na Xunta Xeneral del Principáu d'Asturies declararon esti xueves ser optimistes no que cinca a la futura reforma del Estatutu d'Autonomía del Principáu, que tien d'encarase durante esta llexislatura, y señalaron que la so intención ye que'l testu final seya'l resultáu del alcuerdu de toles fuerces parlamentaries. La tercer d'elles, IX-BA-Verdes, señaló que ta abierta al diálogu, anque dexó claro que nun va consentir qu'Asturies tenga un estatutu ""de segunda"" respeuto de les otres comunidaes autónomes.

El diputáu rexonal y secretariu de la FSA-PSOE, Javier Fernández, declaraba la importancia de la implicación de ""toos"" nel procesu de reforma, de manera que les tres fuerces parlamentaries con representación na Cámara lleguen a un alcuerdu en rellaciones a la ""norma básica institucional"" del Principáu. ""L'alcuerdu ye necesario y ye posible, non sólo col PP, sinón tamién con IX-BA-Verdes"", comentó. De fechu, y en rellación a les diferencies ""concretes"" con IX-BA-Verdes, apostó por ""superales ente toos"".

Pela so parte, el diputáu rexonal y presidente del PP d'Asturies, Ovidio Sánchez, mostróse confiáu en qu'a la hora d'encarar la reforma del Estatutu ""nun va haber problemes"" y basó la so afirmación nes esperiencies anteriores. Reconoció que pue haber ""diferencies"" ente los distintos grupos parlamentarios, anque comentó que namás son ""detalles"" que van intentar ""llimase"" pa que l'alcuerdu final seya ""de tolos grupos"".

Pa finar, la diputada d'IX-BA-Verdes, Noemí Martín, señaló que la so formación política ta abierta al alderique y la ""negociación"", anque sorrayó que siempre sobre la base de que l'alcuerdu final iguale a Asturies en drechos con otres comunidaes autónomes a nivel políticu, competencial, llingüísticu, social y cultural. Nesti sen, comentó que nun ta d'alcuerdu col primer plantegamientu de les fuerces mayoritaries, fundamentalmente'l PSOE, pal qu'Asturies tien de tener un Estatutu ""de segunda""."