Entama mañana’l Festival de Lorient

Entama mañana en Lorient (Bretaña) una edición más del festival de música folk más famosu d'Europa, que llega yá a los 35 años de compromisu ininterrumpíu cola cultura y música de los países atlánticos y qu'anguaño va focalizar n'Irlanda, país convidáu especial d'esta edición, tola atención a lo llargo de los próximos díes hasta'l 14 d'agostu.

La Banda de Gaites de Villaviciosa, el grupu de baille "Xuno" de San Cloyo y los grupos folk Skanda, La Bandina'l Tombo y Llan de Cubel son lo más importante de la delegación asturiana a un Festival de Lorient nel que tampoco nun va faltar ún de los clásicos de tolos años como ye'l Troféu "McCrimmon" (Antiguu Macallan) al meyor gaiteru nel que la representación asturiana, encabezada pol avilesín Rubén Alba, ganador del últimu troféu José Remis Ovalle, va contar tamién col Uvieiín Iñaki Sánchez Santianes, qu'anguaño asoleyó tamién un discu de gaita, Marco Antonio Guardado del Valle, de Sotu'l Barcu, y Jorge Suárez Carbajal, d'El Berrón.

La Sociedá Rexonal de Turismu y el restorán "El Yantar de Campomanes" acompañen a la delegación asturiana nel festival, amás de la esposición "Asturias: arte de un instante" cedida por Caxastur.