Les conseyeríes de Cultura y Educación presenten les actividaes d'espardimientu de la llingua nes escueles

"La directora xeneral de Promoción Cultural y Política Llingüística, Consuelo Vega Díaz, y el director xeneral de Polítiques Educatives y Ordenación Académica, Luis Enrique García Riestra, presentarán esti vienres n'Uviéu les actividaes didáctiques diseñaes esti añu poles Conseyeríes de Cultura y Educación p'alumnos de llingua asturiana de primaria y secundaria. Al actu van asistir los músicos Chus Pedro y Nacho Fonseca y la escritora Montserrat Garnacho, participantes nestes actividaes.

Les Conseyeríes de Cultura y Turismu y Educación y Ciencia lleven tiempu trabayando en comuña col envís d'esparder l'usu y l'estudiu de la llingua asturiana ente los escolares asturianos, amás d'ufrir ferramientes pa favorecer y apoyar el llabor educativu del profesoráu. Con esi doble oxetivu organícense una serie d'actividaes didáctiques que consisten na realización d'un total de 46 conciertos didácticos y sesiones de cuentacuentos n'abondos colexos y institutos de tola xeografía asturiana.

Pa los centros d'Educación Primara ufiertáronse dos actividaes. La primera consiste en facer 21 sesiones de cuentacuentos que van correr a cargu de la escritora asturiana Montserrat Garnacho, autora de delles obres de lliteratura infantil. La segunda son diez conciertos que'l grupu infantil Xentiquina, dirixíu pol maestru y músicu Nacho Fonseca, van ufiertar nun total de 22 centros escolares.

Pa los centros d'Educación Secundaria organizáronse 15 conciertos de Chus Pedro, que va actuar acompañáu pol músicu Gabino Antuña. Col títulu 'Sones d'Asturies. Conciertu Didáctiu', va facese un repasu a una serie de temes de la música tradicional asturiana: vaqueiraes, habaneres, tonada, cancios de ronda o añaes."