100 años de tren en Llanes

El 28 de xunu de 1887 robláronse n'Uviéu los estatutos de la "Compañía de los Ferrocarriles Económicos de Asturias" una empresa que l'añu dempués consiguió la concesión pa facer y esplotar unaa llinia de ferrocarril ente Uviéu y l'Infiestu con vía estrencha d'anchu d'un metru.

El nome de ferrocarriles "económicos" nun yera una casualidá, y ello foi qu'aquella llinia plantegóse como un ferrocarril rápidu, baratu y fácil de sacar alantre, diseñándose col mínimu de desmontes, pontes y otres obres que pudieren encarecer la obra. El resultáu d'ello foi una llinia de tren revesosa, lenta y estrada de curves qu'entovía sobrevive güei esactamente igual a como se diseñó a últimos del sieglu XIX

Aquella llinia entamó a funcionar nel añu 1891 y doce años dempués la compañía decidióse a llevala hasta Les Arriondes gracies a un alcuerdu col Fc. Cantábrico, concesionariu de la llinia ente l'Infiestu y Cabezón de la Sal, na provincia de Santander. L'alcuerdu llevó definitivamente a la xuntura del ramal cántabru de tren de vía estrencha col asturianu, siendo en Llanes onde'l riel que diba pa contra Santander y el que venía d'allá se ficieron ún solu nel branu de 1905. D'esta manera, la compañía de los Económicos, el Fc del Cantábrico y el Bilbao-Santander iguaron una llinia de tren que funcionaba dende Uviéu hasta Bilbao. Mientres la carretera nun pudo facé-y sombra, esta llinia foi'l principal preséu de comunicación de tol cantábricu.

Anque intentó modernizase pasando del vapor al diesel nos años 60, la crisis del carbón y la competencia del tresporte per carretera acabaron por poner en quiebra a la compañía a últimos d'esa década hasta que la xerencia de los Económicos entregó la titularidá de la llinia al Estáu español, que la enxertó na rede de FEVE nel añu 1972. Llamentablemente, de tol parque de máquines y vagones que tuvo la llinia nun se conserven restos d'importancia, en cuantes que toles máquines de vapor s'echaron al desguace.

Agora, 100 años dempués, la llinia del Económicos, que celebró'l so centenariu cola presencia d'una máquina de vapor cedida pol muséu vascu del Ferrocarril faciendo'l recorríu ente Uviéu y Llanes nun guarda nenuna máquina orixinal pero caltién, eso si, la mesma llinia centenaria, na que los trenes modernos nun son a pasar de velocidaes de 80 kilómetros a la hora nes meyores rectes y con dellos tramos señalaos a 30 por hora. El viaxe sigue siendo como d'aquella.