Rabanal manda aselar a IX-BA nel tema de la TV

El conseyeru d'Economía, Jaime Rabanal mandó ayeri nuna intervención que fexo nos cursos de branu de la Granda a Izquierda Xunida - Bloque qu'actuaren"con más prudencia" en rellación a la puesta en marcha de la futura televisión autonómica. Rabanal dixo que nun se-yos podíen tresmitir a los ciudadanos les tensiones y diferiencies sobre los "proyectos relevantes" que lleva alantre'l Gobienu nin tampoco andar "faciéndoles más grandes de lo que son".

Nel tema de la presencia del asturianu ente los requisitos p'acceder a plaza nel Ente, Rabanal defendió lo que se fexo en cuantes que cree que concueya cola llei y en cuantes que l'usu de los idiomes "vien mandáu pol mercáu y pola sociedá". D'otra manera, Rabanal defendió la entrevista personal n'inglés a los aspirantes porque "respuende a les realidaes del mundu en que vivimos", mientres que, en cuestiones identitaries, "caún tien la so opinión".

Tamién la portavoz del Gobiernu y Conseyera de Cultura Ana Rosa Migoya condenó les crítiques d'IX-Ba nel procesu de creación de la RTVAS y especialmente la "retirada de confianza" que Valledor manifestó espresamente esti llunes. Migoya, que remembró que yá se-y dieron avisos al Conseyeru de Xusticia nesti sentíu, entrugóse si lo que busca Valledor con ello ye abrir una crisis de gobiernu.

D'otra manera, l'Asociación de la Prensa d'Uviéu retrucó tamién les crítiques que vienen al procesu de creación del Ente Autonómicu de Comunicación dende la banda d'IX-BA. Al dicir del presidente de l'asociación profesional de prensa uvieína José Antonio Bron, Izquierda Xunida condena'l que se pida'l títulu de periodista pa poder exercer na RTVAs cuando ello ye un requisitu indispensable y "el meyor antídotu contra l'intrusismu llaboral". Pa Bron, que ta d'alcuerdu con como se fexo la convocatoria de places, oponese a la esixencia del títulu de periodismu ye una evidencia del interés que tien della xente p'asitiar na TV a los sos siguidores, atechando na redacción de la TV una "representación de la so cuota política" pa qu'asina-yos "escriban los dictaos".