Castripol alega contra una planta d’esfaltu

El movimientu vecinal nel occidente asturianu ta mostrándose bien activu contra la llegada al so terrén de cualquier instalación contaminante. Si en Salave (conceyu de Tapia) sigue abiertu'l frente contra la mina d'oru, agora los vecinos de Barres (Castripol) tan acabante de presentar alegaciones contra'l proyectu de la empresa Alvargonzález Contratas, que pretende asitiar ellí una planta móvil de procesao d'esfaltu col oxetivu d'atender les necesidaes d'esti material que precise la contraucción de los tramos occidentales de l'Autovía del Cantábricu.

Los vecinos de Barres argumenten en primer llugar que la planta, que diba tar operativa 5 años, diba xenerar un tráficu pesáu de camiones pal que nun tan preparaes les carreteres de la zona, ello aparte de les característiques contaminantes del productu que se cuenta con trabayar na planta, que nel so tiempu de vida útil llibraría a l'atmósfera 158.494 m3 de fumu, 11.500 Kg de partícules en suspensión y 295.000 Kg de diósidu d'azufre, amás de la creación de más de 54.00 tonelaes de "filler" un polvu residual del procesu que nun s'indica onde se van echar. La cercanía de la planta cola playa de Peñarronda, declarada monumentu natural, ye otru argumentu más de la oposición vecinal pa refugar una planta que dicen qu'amás preséntase ensin un plan d'emerxencies en casu d'incendiu o accidente, anque los vecinos tampoco nun son a entender como pue autorizase la construcción d'esta planta por parte de la empresa cuando na redolada yá esisten dos plantes fabricantes d'esfaltu en condiciones d'apurrir el material preciso pa la obra.