"Nun va haber pactu de gobiernu hasta que nun fine la reforma l'Estatutu"

"El secretariu xeneral de la Federación Socialista Asturiana, Javier Fernández, aseguró esti miércoles que la posibilidá d'un alcuerdu pa ""meyorar la gobernabilidá"" d'Asturies, nun va a encarase hasta que ""nun fine'l procesu de reforma del Estatutu"". Asina'l voceru socialista, que daba una rueda prensa dempués de participar na Comisión Executiva Rexonal qu'analizaba los resultaos de les pasaes elecciones, afirmó que'l so partíu taba""en metá d'un procesu estatutariu, que ye un asuntu mui seriu"" y que ""daes les conocíes discrepancies ente IX y PSOE"" nun sería lo meyor ""diseñar dos escenarios de negociación paralelos"".

Asina, al ser preguntáu sobre la posibilidá de llegar a un alcuerdu de gobiernu con IX n'Asturies dempués del 9 de marzu, Fernández sorrayó que ""IX tien los mesmos diputaos que tenía nel parlamentu asturianu"" y añadió que los resultaos electorales ""nun cambien l'aritmética"".

El líder de los socialistes asturianos aseguró qu'agora volverán ""con tola intensidá"" al procesu de negociación entamáu'l pasáu mes d'ochobre, tando agora na que calificó de ""etapa más importante"". Asina, va ser el llunes que vien cuando tornen a aldericar les cuestiones que cinquen al testu estatutariu, teniendo la intención d'aprobalu ""nesti periodu de sesiones o nel que vien"" según Fernández."