Paco Ibáñez canta a Goytisolo nel Filarmónica

"El cantautor Paco Ibáñez canta esti xueves, a partir de les 20.00 hores, nel Teatru Filarmónica d'Uviéu, dientro de los actos de celebración del IV Congresu Internacional José Agustín Goytisolo. Ibáñez, que yá-y dedicara discos a poetes como Federico García Lorca o Pablo Neruda, asoleyara nel 2002 un discu tituláu ""Paco Ibáñez canta a José Agustín Goytisolo"" nel que-y ponía música a poemes perconocíos y musicaos años atrás como ""palabras para Julia"" o ""el lobito bueno"". Xunta con Ibáñez van participar na actuación l'agrupación musical ""Galiardos"".

El recital de Paco Ibáñez val de pieslle pa una xornada que tendrá como tema principal la rellación ente los poetes de los 50 y la música. Asina, a les 9.30 hores, nel Edificiu Históricu de la Universidá, va tener llugar la conferencia ""la música de los poetes de los 50"", empobinada pol miembru de la Real Academia de Belles Artes de San Fernando, Antonio Gallego.

D'otru llau a les 16.00 hores van charrar al rodiu de la mesa redonda 'El legado de José Agustín Goytisolo', los espertos Merçe Bausili, de la Biblioteca d'Humanidaes de la Universidá Autónoma de Barcelona, el traductor Francesco Luti y la docente de la Universidá de VIC, Luisa Cotoner.

La herencia artística de los poetes del 50 va ser el tema central del alderique que tendrá llugar a les 17.00 hores, cola participación del escritor asturianu Xuan Bello, la docente de la Universidá d'Uviéu Araceli Iravedra y el poeta Ricardo Labra. Dempués d'esta actividá y poniéndo-y el puntu a la xornada, Carlos Rodríguez y Miguel Ángel Caballero entamarán un recital poéticu centráu na figura de Goytisolo."