Paz d'Andrés sorraya'l so compromisu cola llingua

"La catedrática del Derechu Internacional Públicu y Rellaciones Internacionales de la Universidá d'Uviéu, Paz d'Andrés, presentó nel día d'ayeri la so candidatura a les elecciones al Rectoráu de la institución. Dempués de formalizar la so concurrencia a los comicios, la candidata a rectora manifestó que ye una ""alternativa"" p'asitiar la Universidá como un pegoyu del desarrollu d'Asturies.

Paz d'Andrés sorrayó tamién el fechu de que la so candidatura ""ta comprometida cola llingua y cultura asturiana, colos valores d'igualdá y solidaridá y cola propia sociedá asturiana"". ""Esti ye un proyectu que va a la busca de la ilusión de la comunidá universitaria"", al tiempu que ""l'anima a participar nos cambios dende l'alcuerdu y la responsabilidá compartida"".

Dientro del discursu de presentación de candidatura, d'Andrés quixo manifestar que yera asturiana, y que nun sólo trabayaba na Universidá d'Uviéu, sinón que tamién estudiara nella. ""Pertenezo al grupu de muyeres que foron algamando les primeres cátedres de la Universidá y d'esta miente tamién quiero abrir camín nesta nueva etapa d'una institución académica con 400 años d'historia"".

El compromisu pa cola llingua asturiana que la candidata al rectoráu, Paz d'Andrés, espresaba nesti discursu de presentación, yá quedara amosáu na serie de midíes en favor de la llingua y la cultura asturiana de les que yá se facía ecu esti mediu nuna noticia del mes de xineru."