El gobiernu fai balance en positivo

Nel pasu del ecuador de la llexislatura, los socios que componen el gobiernu asturianu dan por cumplíes les dos terceres partes del alcuerdu de gobiernu, y comprométense a siguir trabayando xuntos pa cumplir lo que falta.

El presidente Vicente Alvarez Areces, el secretariu xeneral de la FSA-PSOE, Javier Fernández; el coordinador xeneral d'IX, Jesús Iglesias y Rafael Palacios en representación del Bloque por Asturies presentaron ayeri'l documentu nel que faen balance d'estos dos años de gobiernu de coalición. Nel documentu pártese de la base de qu'Asturies avanzó col pautu, ello con haber tensiones, y dizse qu'hai una trayectoria creciente del cumplimientu del pautu, del que se lleven cumplíes dos terceres partes al dicir de los socios de gobiernu.

En cuantes a lo que queda por facer, les fuerces de gobiernu miren pa la política industrial, echar a andar un Plan d'Emplegu Xuvenil o a da-y más puxu al de Normalización Social del Asturianu, que en palabres de los socios de gobiernu, que nun mencionaron la palabra oficialidá, "tien de tar en condiciones de sirvir d'elementu de comunicación a la ciudadanía d'Asturies", anque una de les asignatures pendientes más importantes ye la d'echar a andar el Salariu Social, que ye de les midíes que lleven más retrasu dende que se constituyó'l gobiernu.

La creación d'una llei nueva pola que se mande'l Serviciu de Salú del Principáu, una Llei Asturiana de Protección Ambiental y otra pa la regulación de la función pública son los puntos más importantes na parte de llexislación, anque la midida más espectacular que s'anunció foi la voluntá de construyir 15.000 viviendes "con dalgún tipu de protección" según dixo'l presidente Areces.

Nel separtáu de les valoraciones personales, el secretariu d'IX Jesús Iglesias declaró que los dos años que queden "van a dar entovía munchos frutos" anque ello nun quitó pa qu'Iglesias sacare'l tema de la francedura del pautu de gobiernu nel Conceyu de Mieres, onde acusó a la FSA de maltratar a IX. Pela parte de la FSA Javier Fernández, que negó les acusaciones de maltratu pol asuntu de Mieres, declaró que'l pautu va cumpliéndose acordies colo que taba previsto, mientres que Rafael Palacios sorrayó qu'amás de que'l cumplimientu del pautu ye "irrenunciable" y que nesi sentíu "nun nos plantegamos otru escenariu".

Aparte d'ello, el representante del Bloque por Asturies apuntó a que la situación nueva de reforma del estatutu y cambéu de modelu d'Estáu lleven a un debate que pal BA supón un marcu de compromisu al mesmu nivel que'l pautu de gobiernu. Palacios marcóse l'oxetivu d'abrir un consensu pa que se garanticen p'Asturies los sos derechos políticos, económicos, culturales, y llingüísticos al nivel de les demás autonomíes y nacionalidaes y que se caltenga la solidaridá como pegoyu de la financiación estatal de manera que se garantice que se pueda vivir y trabayar n'Asturies, unos oxetivos que Palacios declaró que "esperamos poder consigulios dientro del pautu actual"