Fernando Alonso, de la primer vuelta a la última

El podium final del Gran Premiu de Francia demostró lo que ye la norma d'esta temporada, col Renault del asturianu no cimero del caxón y col McLaren de Raikonen y el Ferrari de Schumacher nos escalones inferiores. Lo cierto ye que la carrera de Magny Cours foi de les menos entreteníes del añu, col pilotu asturianu mandando la preba dende la salida hasta la bandera a cuadros y ensin más misteriu que'l ver cuanta diferencia-yos sacaba a los sos rivales. Sicasí, tres del asturianu hebo una actuación espectacular, la del finlandés Kimi Raikonen. El pilotu de Mc Laren Mercedes, que salía dende la 13 plaza por culpa de tener que-y poner motor nuevu al coche, remontó hasta la segunda, y queda pal terrén de les suposiciones si'l finlandés pudiere lluchar pol trunfu de nun ser pola penalización pol cambéu de motor. Raikonen llegó a amenazar la plaza d'Alonso cola so estratexa de dos paraes a cargar gasolina en cuenta de trés, pero ensin llograr l'oxetivu.

Tres d'elli llegó un Schumacher que nun tien coche pa face-yos frente a los dominadores del añu, y na cuarta plaza l'actual subcampeón del mundu Jenson Button, dando-y los primeros puntos del añu al BAR-Honda. Jarno Trulli, segundu na parriya, namás pudo acabar quintu dempués de facé-y un gran favor a Alonso al facer de forru rodando segundu nes primeres vueltes, permitiendo que l'asturianu escapare. Fisichella, col segundu Renault, acabó nuna probetaya sesta plaza dempués de munchos problemes, mientres que los puestos con derechu a puntos completáronlos l'hermanu de Schumacher col segundu Toyota y Villeneuve col Sauber. Barrichello, col segundu Ferrari, nun pudo nin puntuar y acabó con vuelta perdida, anque más humillación foi pa Williams BMW ver como los sos dos coches acababen la carrera engarrándose colos Jordan y Minardi por nun quedar los últimos.