Entama'l X Derrame Rock

Entama güei n'Agones (Pravia) la X edición del Festival Derrrame Rock. Los grupos "Orishas" de Cuba y los alemanes "Rage" son los cabeces d'un certame que va contar tamién con históricos del rock duro, casu de "Ñu" y xente más moderno casu de la rapera "Mala Rodríguez" "El Bicho" o "O Funk'ill'o" xunta revelaciones del mercáu discográficu d'anguaño, casu del grupu valencianu de rock sureñu "La pulquería". El festival remata'l domingu nuna fiesta de despidida na que van participar ente otros, "Mägo de Oz" y "Despistaos" xunta la celebración de la final del Concursu de Maquetes del Institutu Asturianu de la Mocedá y "40 Principales Asturias".

Llamentablemente, la mítica banda de punk "The Toy Dolls" qu'apaecíen como cabeces de cartel, nun van poder acudir a Pravia, lo mesmo que la banda arxentina ANIMAL. Pa tapar el güecu que dexen estes dos ausencies, van tar dos gruposbien conocíos del públicu como son Def Con Dos y Banda Basotti xunta una banda más de nuevo, el grupu de heavy Skizoo.

La representación asturiana en Derrame Rock cuenta esti añu cola participación de "Dixebra". La banda de Xune Elipe toca güei vienres, mientres que'l sábadu va xubir al escenariu "Fé de Ratas" grupu onde destaca la presencia de la guitarra de Rafa Kas y que ta acabante de sacar discu. Finalmente, Tante Blanco y los demás Berrones van tocar na fiesta de despidida del certame.

Tocántenes a les actividaes culturales que se desenvuelven paralelamente al Derrame Rock, rescampla ente elles una esposición fotográfica sobre la única visita del Che Guevara a España. Ello foi que nel añu 1959, el Che diba pa El Cairo como representante del gobiernu cubanu. El so avión fizo una escala en Madrid y El Che aprovechó la ocasión recorriendo Madrid pola so cuenta acompañáu pol fotógrafu Cesar Lucas, que fizo les semeyes d'onde sal el material d'esta esposición. Tamién va haber un video fórum con proyecciones documentales sobre los campos d'esterminiu nazi, nel añu del 60º aniversariu de la lliberación d'Auschwitz. Los alderiques van tar presentes col polémicu tema la piratería, nuna mesa redonda onde se quier que tean toles partes implicaes, incluyida la SGAE. El propiu Derrame Rock tamién va tener el so protagonismu nesti apartáu cultural con una esposición sobre los diez años d'historia del festival. Pela so parte, el grupu teatral "Margen" va llevar al escenariu del Derrame'l sábadu la obra "War".


Más información na web del Derrame Rock