La contaminación afuega'l centru d'Asturies

Los datos sobre Calidá del Aire n'Asturies pal 2004 presenten una Comunidá que supera tolos topes de contaminación en prácticamente toles estaciones de la rede de control y en munches de les estaciones de les grandes empreses del país, un fenómenu de contaminación que ye más evidente n'Avilés y la so redolada.

Estes son les conclusiones a les que llega l'Asociación Ecoloxistes n'Acción dempués d'analizar los datos oficiales de Calidá del Aire n'Asturies del añu 2004 que-y apurriere a la organización el Serviciu de Xestión Ambiental. Según Ecoloxistes n'Acción, del analís de los datos sácase en conclusión que la Comarca d'Avilés foi la parte d'Asturies que sufrió más casos de contaminación atmosférica, perpasando tolos niveles llegales d'inmisión, ello ye, concentración de contaminantes nel aire y onde foi preciso'l decretar alertes atmosfériques por dióxidu de nitróxenu y dióxido d'azufre.

Según los datos oficiales, la Estación nº 3 asitiada n'Acería LDA d'Aceralia-Avilés, llegáronse a niveles d'alerta pal óxidu de nitróxenu, contaminante que pasó la raya de los 400 mg/m3 d'aire durante trés hores siguíes, llegando a marcar concentraciones de 690 mg/m3, unes cantidaes penriba de lo que se considera permisible que se midieron tamién, nesti casu col azufre, na Estación del Llaboratoriu de la rede d'Asturiana de Zinc, a pocos kilómetros de la d'Aceralia. Nel casu d'AZSA, l'azufre llegó a marcar concentraciones de 500 mg/m3 durante más de tres hores, pasándose amás la raya del Valor Tope Horariu de protección de la salú para el dióxidu d'azufre, que ta asitiada nos 380 mg/m3 y que llegó a marcar emisiones puntuales horaries de 893 mg/m3. En dellos díes del añu esti contaminante perpasó tamién la marca diaria de los 125 mg/m3 llegando a valores diarios de 510 mg/m3. Otra estación de medición
Que tien AZSA asitiada na balsa de Jarosita nun llegó a pasar los topes llegales, pero sí que s'allegó a ellos bien de vegaes.


Otra estación de control avilesina, asitiada nel Mataderu, pasó 16 vegaes el Valor Tope Horariu pal dióxidu d'azufre. Anque la llei permite que se dean nel añu hasta 24 emisiones puntuales penriba del tope, el dióxidu d'azufre nel mataderu llegó a marcar valores de 690 mg/m3 cerca del doble de lo que se permite.

La estación de mediciónde la Depuradora, que pertenez a la rede de la fábrica d'aluminiu d'ALCOA pasó tamién un Valor Tope Diariu, nesti casu'l de Partícules en Suspensión PM10, neto que'l Valor Tope Anual. Esta mesma circunstancia diose nes estaciones de Llano Ponte, Llaranes, Plaza Guitarra y la del Mataderu, pertenecientes a la Rede Automática de l'Alministración Asturiana.

Con ser grave'l casu d'Avilés, otros conceyos asturianos anden tamién allegaos a valores de contaminación qu'esmolecen. Asina, la estación de Sianes en Carreño, na redolada de la Térmica d'Aboño pasó los topes diarios de dióxidu d'azufre, mientres que los valores tope de Partícules PM10 valtáronse en toles estaciones de control asitiaes na redolada de la térmica y la fábrica de cementu d'Aboño. Aceralia Xixón tamién ta tres d'un imoprtante volume de contaminación, como demuestra'l fechu de que la estación de control de Montiana se llegare a los184 mg/m3 de partícules PM10 n'emisión puntual y se pasaren los topes añales d'estes partícules qu'amenacen a tola ciudá, en cuantes que los medidores de Tremañes, Avenida de l'Arxentina y Avenida de la Constitución pasaron los máximos que se consienten nun añu d'estos axentes contaminantes.

Polo que-y toca a la Cuenca del Nalón, en llangréu les estaciones de Turiellos y el Sanatoriu Adaro, dientro de la rede de control de la térmica de Lada pasáronse los topes diarios de dióxidu d'azufre. Mientres que en Sama y Meriñán pasáronse los topes añales de partícules PM10.

Pela so parte, la capital asturiana presenta problemes graves por dióxidu d'azufre en plena ciudá, pasándose les marques llegales de dióxidu d'azufre en dellos díes concretos y los topes diarios y añales de partícules PM10 nes estaciones de control de Pura Tomás y la Plaza de Toros, unos valores qu'Ecoloxistes n'Acción dicen que se deben a que l'aire lleva los contaminantes de la térmica de La Ribera pa contra Uviéu.