La Xunta Xeneral aprebó por unanimidá’l Plan de Normalización

35 votos a favor y nengún en contra foi'l resultáu que rexistró'l marcador de la Xunta Xeneral del Principáu na sesión en que s'aprebó'l Plan de Normalización Social del Asturianu. El documentu pol que va mandase la política de normalización de la llingua asturiana d'equí al añu 2007, que yá taba aprebáu en Xunta de Gobiernu, órganu dende'l que se remitió al Parlamentu Autonómicu, recibió 8 amestadures del Grupu Popular que s'aprebaron tamién.

La Conseyera de Cultura Ana Rosa Migoya foi la primera en falar na sesión d'ayeri de la Xunta Xeneral del Principáu que tenía d'aprebar el Plan de Normalización del asturianu. La Conseyera definió'l Plan como un documentu que s'axusta a la llei vixente y como un conxuntu de midies cola volunta d'unise alredor del patrimoniu comun. Migoya sorrayó que con esti plan el Gobiernu asturianu nun quier asitiase nin nel imovilismu nin en posiciones que van mas allá de la llexislacion vixente, definiendo l'oxetivu del plan como'l d'unir diverxencies ente visiones y qu'asina nel tema de la llingua solo haya discusión sobre coses secundaries y non sobre asuntos de fondu, en cuantes que nadie podía dicir que'l plan propuestu yera "inasumible pola sociedá". La Conseyera, que terminó la so intervención n'Asturianu, fizo referencia espresa a la cuestión del Eo-Navia, de la que dixo que ye competencia esclusiva del gobiernu asturianu, aclariando que naide tenía de preocupase por ello.

Dempués de la intervención de la Conseyera, salieron a esponer el so paecer sobre'lPlan los trés grupos parlamentarios, una serie de comparecencies na que por parte d'Izquierda Xunida - Bloque por Asturies faló la diputada Paloma Uria, que definió'l Plan como un pasu importante, pero minimu y como un documentu que nun tien tolo que debia tener pero que ye un avance. La diputada d'IX-BA llamóal cumplimientu íntegru del Plan, faciendo referencies mui concretes a les cuestiones relatives a enseñanza, tanto a nivel de dignificar la llingua énte l'alumnáu como de meyorar la situación de los mayestros de l'asignatura, y a la entrada del asturianu nel Ente de Comunicación autonómicu. Alunmnos y mayestros. Pue valir pa sensibilizar a la sociedá.

Pol Partíu Popular faló'l diputáu Joaquín Aréstegui. Pal diputáu avilesín l'asturianu "Ye un tema curiosu porque a toos nos toca no personal". Calteniendo un opuntu d'ironía y distanciamientu en tola so ponencia, el representante popular dio anuncia de que'l so grupu diba apoyar el Plan na votación, pero esplicó que diba facelo "Cola boca pequeña y sin entusiasmu". Aréstegui foi críticu cola actitú del gobiernu al redactar el Plan por llevalu a la Xunta Xeneral ensin consensualu primero col PP, dalgo que nun sentó bien ente les files populares pero que nun diba quitar pa que'l grupu popular votare a favor del Plan en cuantes que "tenemos que dir a lo que nos une y a lo positivo, y la llingua ye un tema importante". Una importancia que pal representante popular traduzse en que lo del plan ye un "entremés" nel horizonte de la reforma estatutaria, que p'Aréstegui va ser un procesu "nel que'l PP quier asitiase na equidistancia" anque dexando claro que los planes del PP nun pasen pela oficialidá, que tampoco demanda mayoritariamente la población asturiana, Aréstegui declaró que ye preciso abordar la necesidá de "una politica llingüística que se faiga ensin imposiciones, inmersiones nin artificiosidaes". El grupu popular foi l'únicu que propunxo amestadures al testu orixinal del plan. Referíes les más importantes d'elles a la normalización nel ambitu de los conceyos y a la enseñanza, les propuestes del PP aceptáronse tamién na redacción del Plan.

Finalmente, pol Grupu socialista intervinó José Luis Montes. El que fuere Conseyeru d'Educación sorrayó los puntos de vista espuestos pola Conseyera de Cultura y destacó que'l mayor valor del Plan ye que ye positivu porque desbloquea actitúes negatives, congraciándose de la voluntá de consensu demostrada por tolos grupos parlamentarios nesti asuntu. Montes asoleyó la custión de la oficialidá, una pallabra que sigue siendo tabú pa los dos grupos mayoritarios y amás, visto lo visto ayeri, pol mesmu argumentu: la falta de demanda social.