Tejedor podríen acompañar a Van Morrison en Xixón

La promotora de Tejedor negocia que seyan los teloneros de Van Morrison nel conciertu que'l músicu irlandés va dar en Xixón el mes qu'entra.

El grupu de folk asturianu de los hermanos Tejedor, que yá fueren teloneros de Van Morrison nun conciertu que diera la estrella irlandesa en Valencia nel branu del 1999, cuando taben acabante d'espublizar el so primer discu, podría repetir esperiencia y agora cola ventaya de xugar en casa. Dende la promotora El Cohete, que xestiona los conciertos de Tejedor y que ye tamién la responsable de la presencia de Van Morrison en Xixón pa ún de los dos únicos conciertos que va dar el Lleón de Belfast n'España nesti 2005, nun tan en condiciones d'asegurar que vaya producise la contratación de los asturianos, pero sí qu'esperen con optimismu la rempuesta del músicu de Belfast, que'l 26 de xunetu va actuar na Plaza de Toros de Xixón nun conciertu pal que les entraes, a precios de 30 y 45 euros yá tan a la venta dende'l sábadu y nel que, por espresa voluntá del artista, toles entraes van ser d'asientu.