El CAO quier una mesa estable colos grupos parlamentarios

"Asturies nun pue quedar como la única comunidá autónoma que tien llingua propia y nun la fai oficial". Con estes palabre resumió Fernando Ornosa, representante del Conceyu Abiertu Pola Oficialidá (CAO) la postura d'esta plataforma que formen cerca de cien asociaciones, partíos políticos y sindicatos, énte la reforma del estatutu.

Pa llegar a ello, el CAO ye consciente de que la oficialidá nun pasa pela fueya de ruta de los dos partíos mayoritarios n'Asturies, pero de cualquier manera los responsables de la plataforma que'l mes de marzu organizare una multitudinaria manifestación n'Uviéu en defensa de la oficialidá parten de la base de que dientro lo mesmo del PSOE que del PP esiste un posicionamientu más abiertu que n'otres ocasiones, una aperturismu que se vería en delles declaraciones públiques y tamién nes postures personales de dellos miembros destacaos d'estes organizaciones.

Pa qu'esti aperturismu cuaye en daqué concreto, el CAO va entamar estos díes a presentá-yos a los grupos parlamentarios de la Xunta Xeneral del Principú un documentu que, baxo'l títulu "Una propuesta de diálogu pa salvar la llingua asturiana" pretende abrir una mesa de negociaciones colos trés grupos con representación institucional con vistes a que la oficialidá se reconoza na próxima reforma estatutaria. Los responsables del CAO defenden que lo ideal sedría una mesaconxunta con tolos partíos, pero tan dimpuestos si fuere preciso a aconceyar por separao con cada grupu parllamentariu si ello ayuda a que'l diálogu avance meyor. En cualquier casu, la intención ye qu'esta mesa aconceye periódicamente y con un calandariu de reuniones pautáu y estable, participando na mesma representantes de los partíos y espertos propuestos pol CAO. Xulio Casado, ún de los miembros del CAO presentes na rueda de prensa, esplicó que la propuesta intenta "tender pontes de diálogu" un diálogu que Fernando Ornosa tien l'oxetivu de facer ver que "la oficialidá ye la solución y non el problema a una reivindicación con respaldu social y que lleva trenta años n'axenda política d'Asturies"