L'ALLA espubliza un estudiu sobre una xíriga berciana

L'Academia de la Llingua Asturiana y l'Institutu d'Estudios Bercianos asoleyen un estudiu sobre'l Burón, la fala de los vendedores ambulantes de Forniella.

Alejandro López Álvarez ye l'autor d'esti estudiu que fai'l númberu 9 dientro de la colección preseos de l'ALLA y nel que, partiendo de l'alcordanza de la propia vida, l'autor fai un analisis de la sociollingüística de la fala de los comerciantes d'esti valle que ta atiestando colos conceyos asturianos d'Ibias y Degaña y na que l'autor atopa rasgos identificativos del asturianu y del gallegu. Cerca de 260 palabres igüen el vocabulariu d'esta fala gremial que, al dicir d' Alejandro López ta dotada de mecanismos mui interesantes a la hora de deformar les pallabres de les que se val como materia prima, sobremanera anestándo-yos sufixos. L'estudiu estrema más de quince estayes semántiques nel Burón que faen referencia les más importantes de les mesmes al comerciu, las rellaciones sexuales, los oficios o la comida, too ello lo más críptico y escuro posible pa que nadie pudiere entendelo, anque'l mesmu autor apunta que los dueños de les pensiones au s'agospiaben estos vendedores ambulantes sí llegaben a tener munchu tratu colos comerciantes y con ello a conocer el significáu de bien d'espresiones del Burón.