Asturies firma pol frangüesu

El Conseyeru de Mediu Ambiente, Ordenación del Territoriu y Infraestructures, Francisco González Buendía, firmó ayeri una iniciativa de cooperación institucional pa la creación de programes de trabayu comunes ente distintes Comunidaes Autónomes empobinaos a la recuperación del frangüesu, especie desaniciada dende va cerca de 50 años de la cordal cantábrica y que ta volviendo a repoblar los nuestros montes gracies al llabor de la Fundación Frangüesu.

Asturies, Aragón, Castiella y Lleón y Cantabria.son les partes firmantes d'esti conveniu que se da nel marcu del Primer Seminariu Técnicu sobre recuperación del Frangüesu na cordal Cantábrico-Pirenaica, qu'organiza'l Gobiernu asturianu en collaboración cola Fundación Frangüesu y el Parque Nacional de los Picos d'Europa. L'oxetivu d'estes xornaes ye'l diseñu d'un proyectu integráu na Rede Ecolóxica Europea Natura 2000 en rellación a esta especie

El seminariu comprende la formación de grupos de trabayu que garanticen la participación científica, alministrativa y social nel proyectu, que va enfocase a iniciatives de recuperación de la especie que fomenten el desarrollu y la participación de la población local, aspectu que pa la Fundación Frangüesu ye esencial, y ye que losconservacionistes que s'encarguen d'esta especie, la presencia del frangüesu podría traducise nuna mayor llegada de turistes,ente otres ventayes.

Desaniciaos cásique de toa Europa, los frangüesos quedaron arrequexaos a mediaos del sieglu XX a la parte del Pirinéu, onde s'entamaron va años midíes de recuperación que permitieron que la especie guañare y se llegare a una población de 400 exemplares. Como'l frangüesu suel dir espardiéndose per llugares nuevos según va multiplicándose la especie, l'area xeográfica que cubre ye cada vegada mayor. Según datos de la Fundación, nel 2004 rexistróse la presencia estacional de dellos exemplares nel parque de Los Picos d'Europa y na parte alta del Cares, onde se vieron frangüesos volando ente los meses de febreru y mayu, datos que confirmaron y meyoraron los del añu 2.003, cuando yá se diere anuncia de la presencia ocasional d'una pareya de frangüesos nel parque. El siguiente pasu na campaña de recuperación podría incluyir la suelta d'exemplares de frangüesu del Pirinéu Aragonés en territoriu asturianu.