La TV más polémica

La TV autonómica ye ún de los asuntos que ponen más encesu'l debate na Xunta Xeneral. Pela parte del PP, el diputáu Fernando Goñi acusó al PSOE y IX-BA de boicotiar la comisión parllamentaria de control de la TV y reclamó la presencia del presidente del Conseyu d'Alministración del Ente Bernardo Díaz Nosty, ausente por exámenes na Universidá de Málaga.

Tamién con motivu de la comparecencia del director del Ente de comunicación autonómicu na Xunta Xenetral, la diputada d'Izquierda Xunida - Bloque por Asturies Diana Camafeita llamentó que se filtraren datos sobre'l procesu de selección del personal pol que va mandase la contratación de la plantiya de la TV enantes de que tuviere conocimientu d'ello'l Conseyu d'Alministración, en referencia a unes declaraciones que fexere la selmana pasada José Ramón Pérez Ornia. La diputada pidió tamién que los conocimientos de llingua asturiana tuvieren una consideración específica nes prebes d'accesu a la TV autonómica, repitiendo unes crítiques que yá fexere IX-BA la selmana pasada al traviés d'un comunicáu de prensa.

Precisamente en rempuesta a estes crítiques al procesu de selección del personal d'IX-BA posicionóse l'Asociación de la Prensa d'Uviéu. Foi nun actu organizau por esta asociación onde Ornia dio a conocer dellos puntos de cómo va ser esi procesu d'accesu a la canal autonómica. L'asociación profesional que preside José Antonio Bron diz que "a la coalición molésta-y un Ente que nun se pueda caciplar" llegando a falar de "sospeches fundaes de pagu de favores y cuotes polítiques coles que delles agrupaciones polítiques pretenden pagar a los sos afiliaos pa metelos na redacción de los informativos d'esa televisión".

Pela so parte, otra asociación profesional "Periodistes pol Asturianu" ta llevando alantre a lo llargo de les últimes selmanes una ronda d'entrevistes colos partíos políticos con representación na Xunta Xeneral y colos responsables del Ente Autonómicu a efectos de dar a conocer los posicionamientos del colectivu sobre la necesidá de da-y una presencia digna a la llingua na programación de la canal autonómica, que pa esta asociación tien de ser una plataforma pa la recuperación y dignificación del idioma. Na ronda d'entrevistes, que la selmana pasada incluyó a Diana Camafeita (IX-BA) y Ovidio Sánchez (PP) l'asociación ta faciendo entrega d'un dossier documental en que se recueyen dende la presencia histórica del asturianu nos medios de comunicación hasta la llexislación vixente sobre la materia, lo mesmo que se proponen a títulu comparativu, los casos d'otres televisiones qu'emiten pa llugares con llingua minorizada. Esta mesma mañana, Periodistes pol Asturianu tenía acutada entrevista col director del Ente, Jose Ramón Pérez Ornia pa facé-y entrega d'esti dossier.