Galicia, pendiente del votu de la emigración

Les elecciones na comunidá vecina dexaron un resultáu apertáu enforma. El PP baxó de los 41 escaños que tenía a 37, mientres que'l PSOE xubió espectacularmente, pasando de 17 a 25. Pela so parte, el BNG baxó enforma, nesti casu de 17 a 13. Con ello, si PSOE y BNG s'amestaren, el gobiernu gallegu taría nes sos manes por una suma de 38 contra los 37 del PP. Sicasí, la diferencia de votos ye mui pequeña en bien de llugares, y concretamente nel casu de Pontevedra, onde PP y PSOE se disputen un escañu por un marxe de poco más de 8.000 votos.

El recuentu del votu de la emigración podría entornar el resultáu y da-y esi escañu "llave" al PP, anque pa ello, y n'aplicación de la Llei d'Hont pola que se manden los procesos electorales nel Estáu Español, ye preciso que'l PP recupere la diferencia de 8.000 votos más un tantu por cientu adicional, colo que la diferiencia real pol escañu de pontevedra ta agora mesmo en cerca de 10.000 votos. Nes elecciones del 2001, el votu emigrante de Pontevedra repartióse en 13.292 pal PP, 4.559 pal PSOE y 1.186 pal BNG.


Más información en: Web oficial de les elecciones en Galicia
Vieiros
La Voz de Galicia