La UE alerta sobre les consecuencies del Cambiu Climáticu

"La Unión Europea alerta de que'l cambiu climáticu va subir la presión migratoria y los conflictos ente los países de pasu y acoyida de los inmigrantes. Asina mesmo avisa de qu'aumentarán les griesques sobre los recursos ""polares"" que van poder esplotase gracies al calentamientu global.

Estes alvertencies alcuéntrense dientro d'un informe sobre l'impactu del cambiu climáticu sobre la seguridá ellaboráu pol Altu Representante pa la Política Esterior y de Seguridá Común, Javier Solana, y pola so Comisión, y que va presentase nel aconceyamientu de llíderes europeos que va tener llugar en Bruseles los díes 13 y 14 de marzu.

""El cambiu climáticu pue considerase como un multiplicador d'amenaces que dispara les tendencies, les tensiones y les inestabilidaes que yá hai. Ye importante tener en cuenta que los riesgos nun queden namás nel tarrén de lo humanitario, sinón tamién de lo político y de la seguridá qu'afecta directamente a los intereses europeos"", sorraya'l documentu.

El testu dedica-y un apartáu especial a la inmigración producida arriendes del mediu ambiente, conseñando que ""les poblaciones que yá sufren condiciones de probeza y falta de salú, emplegu o marxinación social, son más vulnerables a los efectos del cambiu climáticu, que puen ampliar o desendolcar migraciones dientro d'un país o ente países"". Nesti sen, recuerda que la ONU yá pronosticara qu'habría ""millones"" de migrantes mediuambientales en 2020.

El casu que más esmolez ye'l d'África, onde la falta d'agua y la degradación del suelu pue producir una perda d'hasta'l 75% de tierra de llabor. D'esta miente, la UE pon l'exemplu de Darfur, onde, dende'l so puntu de vista'l ""cambiu climáticu ta ""teniendo un impactu importante""."