La toponimia sigue allancada en Conseyu de Gobiernu

L'organismu del executivu asturianu, qu'aconceyó ayeri, lleva ensin aprebar más espedientes toponímicos dende'l 21 d'abril, cuando-yos diera'l preste a los llistaos de Carreño, El Franco y Llanes.

Dende aquel 21 d'abril el Conseyu de Gobiernu nun volvió a tratar más cuestiones rellacionaes colos espedientes toponímicos. Ello contrasta coles declaraciones que fexere'l responsable de política llingüística del Principáu Ramón d'Andrés, que dixere nel so momentu que contaba con que la siguiente tanda de trés conceyos, na que diben L.lena Llangréu y Gozon, tuviere aprebada "pa enantes del mes de xunu". Ello choca cola realidá d'una burocracia que va más despacio de lo previsto, en cuantes qu'a mediaos de xunu del 2005, entovía namás son los trés primeros conceyos los que yá tienen la so toponimia oficial revisada. Ramón d'Andrés dio al respective un mensaxe de tranquilidá y esplicó a Asturies.com que "nun hai nengún tipu de bloquéu" y que l'aprebación de los topónimos de L.lena Llangréu y Gozon, aprebada yá previamente nos sos respectivos ayuntamientos, "ta siguiendo'l trámite pelos calces normales" colo que tendrán de pasar per Conseyu de Gobiernu "en feches próximes".

Mientres, la Xunta de Toponimia sigue desarrollando'l so llabor independientemente de la lenta marcha de l'alministración del Principáu. Según esplicó Ramón d'Andrés, l'organismu encargáu de la revisión de la toponimia asturiana ta trabayando intensamente sobre los nomes de llugar de los conceyos de la Comarca de la Sidra. Cabranes, Sariegu y Bimenes, los trés más pequeños de la mancomunidá, yá tienen fechu un primer repasu, mientres que nes selmanes que vienen tan yá acutaes reuniones pa evaluar los casos de Colunga, Nava y Villaviciosa. El conceyu de Llanera ta tamién nuna fase avanzada del procesu d'ellaboración del so espediente toponímicu, que yá ta namás pendiente d'una reunión que va tener llugar la selmana qu'entra pa que'l Conceyu plantegue delles observaciones de detalle al llistáu propuestu. Más complicáu ye'l casu de Xixón, onde'l Conceyu quixo amestar al llistáu una gran cantidá de topónimos menores que nun figuraben nel llistáu orixinal y que la Xunta de toponimia va tener qu'estudiar agora. P'acabar, el procesu más avanzáu ye'l d'Ayer, onde l'espediente yá ta termináu.