Dixebra da un adelantu del so nuevu discu n’Asturies.com

Dixebra presenta oficialmente d'equí n'ocho díes el so nuevu discu "ensin novedá" una estrena que va facese na nueche de la foguera de San Xuan en Xixón. Primero d'ello, el grupu quier dar a conocer ún de los cantares del discu al traviés d'Asturies.com pa que tolos llectores d'esti diariu puean descargalu. "Vieyu combatiente" que ye como s'entitula'l tema, ta disponible dende esti enllace.

L'octavu discu nos quince años de carrera del grupu avilesín preséntase como un amiestu de rap-metal y ska-reggae, anque ensin escaecer otros estilos presentes a lo llargo de tola vida de Dixebra como'l rock o'l folk. Amás del cantar qu'ufiertamos pa descargar, el serviciu d'Asturies.com TV tien disponible un documental que se grabó colos miembros del grupu nos estudios Tutu de Corvera nos últimos díes de la preparación del discu.