La negociación pal trespasu de la FEVE entama en setiembre

El Gobiernu asturianu y l'alministración central del Estáu van entamar pal mes de setiembre la negociación pal trespasu de les competencies sobre recursos y aprovechamientos hidráulicos y sobre los ferrocarriles de vía estrencha que circulen por territoriu asturianu.

Francisco Javier García Valledor, conseyeru de Xusticia y Asuntos Esteriores, quier que se llegue a un alcuerdu sobre esti particular enantes de que se llegue a la reforma estatutaria, un esmolecimientu que-y tresmitió a la secretaria de d'Estáu de Cooperación Territorial, Ana Isabel Leiva.

La llucha por revertir a Asturies la xestión de los ferrocarriles de FEVE vien de vieyo y podríen despesllase nesta llexislatura unes competencies que n'anterior llexislatura'l Gobiernu del PP aneció en nun querer negociar. La Llei del Sector Ferroviariu, aprebada en payares del 2.003 pol PP, trancaba efectivamente la puerta a qu'Asturies pueda asumir la rede propio de ferrocarriles, una descentralización que yá funciona dende va 25 años n'Euskadi y a la que s'amestaron poco dempués Cataluña y yá mas de recién Valencia y Mallorca y que l'Estatutu d'Autonomía d'Asturies contempla nel so artículu 10.1.5. El gobiernu central encontóse siempre pa nun dar la xestión del ferrocarril en que delles llinies asturianes tienen ramales que siguen per otres comunidaes, colo que nun podía dicise qu'aquellos trenes fueren propios de la CA asturiana.

En febreru del 2004 el Conseyu de Gobiernu d'Asturies aprebó que'l Principáu pidiere les competencies nesta materia y tamién sobre los recursos hidrográficos qu'anguaño xestiona la Conferderación Hidrográfica.

A la llegada del PSOE al Gobiernu d'España en marzu del 2004 una de les primeres midíes que se tomaron foi la d'aparar la llei del sector ferroviariu del PP. La reclamación asturiana esixe la entrega a l'autonomía de les llinies ente Xixón y Pola Llaviana, Uviéu a San Esteban y Uviéu - Col.lanzo. El ferrocarril Ferrol-Xixón y el d'Uviéu a Llanes quedaben fuera de la reclamación que se fexo en febreru del 2004 por considerase qu'entraben a otres comunidaes.