Un autor asturianu lleva los xuegos tradicionales a la escuela

L'avilesín Carlos Suari Rodrigue ta acabante d'asoleyar cola editorial especializada Wanceulen el llibru "Juegos tradicionales: del curriculum a la clase" nel qu'analiza los distintos xuegos populares, rurales y tradicionales de la península y estudia la manera d'enxertalos nes asignatures d'educación física.

El llibru de Carlos Suari parte de la esistencia nos currículos nuevos d'educación física pa ESO y Bachilleratu d'espacios acutaos pa les actividaes lúdico-físiques y los deportes tradicionales. Aprovechando esti reconocimientu, esti mozu autor asturianu ye pioneru en teorizar sobre la meyor manera d'enxertar estos xuegos y deportes na escuela. La obra del profesor avilesín, asoleyada pola editorial sevillana especializada en temes deportivos Wanceulen apauta unes bases teóriques de lo que se pue considerar "xuegu tradicional", faciendo un estoyu del repertoriu de los mesmos con una especial atención al casu asturianu por ser el que tien más cercanu. Tres d'ello, el llibru fai una propuesta d'adaptación metodolóxica d'estos xuegos y deportes pa concasalos colos oxetivos de la educación física, llegando hasta la formulación d'unidaes didáctiques nuna obra d'evidente calter prácticu.

Xuegos como la llave, la rana, los bolos, les distintes modalidaes de llucha apaecen espeyaes nesti llibru con actividaes y unidaes desarrollaes específicamente p'adaptales a cada contestu educativu nuna obra que tamién atiende a la especifidá cultural de cada llugar onde se desarrolle l'actividá, encamentando a los docentes que caltengan tolos aspectos llingüísticos y de vocabulariu autóctonu que van arreyaos a los distintos xuegos en cada comunidá autónoma
.

L'autor, Carlos Suari Rodrigue (Avilés 1982), ye llicenciáu en Ciencies de l'Actividá Física y del Deporte pola Universidá de Lleón, amás de monitor y xuez de deportes tradicionales na federación asturiana. Según comentó l'autor a Asturies.com, amás del contentu personal que supón poder llevar a un llibru el resultáu d'años d'investigación, amiéstase tamién el fechu de que foi la propia editorial la que demostró dende un primer momentu un gran interés por asoleyar esta obra, ello nuna especialidá como la que se trata nel llibru que nun suel tener muncha salida editorial.