CSI y SUATEA siguen cola so campaña de protestes pol desmantelamientu d’Asturies

La central sindical CSI y el sindicatu d'enseñanza SUATEA convoquen mañana en La Felguera una manifestación que baxo'l lema específicu "¿Qué-y dexamos a la mocedá nes cuenques?" y dientro del xenéricu "Gobiernu y patronal desmantelen Asturies" supón un pasu más dientro de la campaña de movilizaciones de protesta que dambes organizaciones entamaron conxuntamente'l pasáu 16 de marzu con una manifestación en Xixón contra la situación actual del país, qu'estes organizaciones camienten que ye "de desmantelamientu industrial d'Asturies". La marcha ta convocada pa mañana miércoles 15 de xunu a les siete y media de la tarde nel parque Duro de La Felguera (Llangréu).

La política de privatizaciones y la emigración de la mocedá sedríen dos de les materializaciones d'esa política de desanicie del país, qu'amás rescamplen nes cuenques con más violencia que n'otros llugares, al tenor de los índices de desemplegu y la perda de población que carecen tolos conceyos del Caudal y del Nalón. Ente les reivindicaciones de la marcha, amás de desixir un apueste "pol caltenimientu del emplegu y de les empreses n'Asturies" va ta tamién el seguru de paru y la Renta Básico.

Les organizaciones convocantes concueyen na so interpretación de l'actual situación d'Asturies, y asina ye que pa elles anque Asturies tien un nivel altu de renta gracies a les prexubilaciones y les ayudes pa zarrar industries, pozos y ganaderíes, ello fai que s'escuenda'l problema del desmantelamientu xeneral, del ermu de pueblos y comarques y de la mengua de la población, ello pese a la llegada d'inmigrantes. De fechu, CSI y SUATEA argumenten na convocatoria qu'esiste un oxetivu políticu del que responsabilicen al PSOE consistente en menguar la población d'Asturies hasta asitiala nes 700.000 persones.