Zapatero: "Miramos pa dellos grupos, sobre manera CiU y PNV"

"El presidente del Gobiernu en funciones, José Luis Rodríguez Zapatero, insistía nes primeres declaraciones dempués de conocer los resultaos del domingu, na so voluntá de charrar con toles formaciones. Por embargu, na entrevista concedida a Telecinco esta mañana, Zapatero dexaba entender la so predisposición a pactar con CiU y PNV, garantizando asina la estabilidá del so gobiernu durante esta llexislatura. ""Miramos pa dellos grupos, los dos principales son CiU y el PNV, que van tener grupu parlamentariu, pero cuento charrar con toos, tamién con IX, que sufrió una baxada bultable"", sorrayó.

Na mesma entrevista'l presidente en funciones aseguraba tar ""optimista"" énte la llegada ""d'un nuevu tiempu con más estabilidá"" pal Gobiernu. El presidente precisó que'l so oxetivu ye qu'esa estabilidá seya ""garantizada con proyección nel tiempu"".

No que cinca a les crítiques recibíes al rodiu del sistema electoral, Rodríguez Zapatero reconoció qu'IX podría sentise ""infravalorada"" pola poca representación parlamentaria qu'algamara, polo qu'aseguró que ""enantes o dempués abriremos una reflexón"". Sicasí Zapatero defendió asina mesmo que tolos sistemes electorales tienen ""puntos débiles y son meyorables"", anque aseguró que les cuentes que saquen de 30 años de democracia amuesen qu'esti ""ta funcionando bastante bien""."