Llega'l corchu de silicona

El llagar Fonciello de Tiñana (Siero) ta acabante de presentar una novedá nel mundu la sidra cola entrada en mercáu de les primeres botelles de la bebida asturiana corchaes con silicona. La falta de corchu de calidá, en cuantes que lo más de lo qu'hai acútase pal vinu, decidió a los xerentes del llagar de Siero a atrevese a probar colos corchos de silicona que vieren nuna feria profesional. Como primer intentu pa ver como entra en mercáu, Fonciello ta repartiendo dende güei les primeres 15.000 botelles corchaes con silicona. El corchu de material sintéticu, que vien pintáu n'azul y mariello semeyando la bandera d'Asturies, pieslla herméticamente la botella y permite tener la sidra guardao en botella más de dos años ensin que pique nin pierda facultaes. Anque nun ta claro como puen reciclase los corchos de silicona,en Fonciello tienen pa ellos que l'usu d'esti material pue ayudar a aselar el gastu de corchu natural nun momentu en que'l carbayu corcheru, árbol del que se saca'l corchu, ta menguando en tol mundu.