La crisis del bocarte protagoniza'l Día Mundial del Mar

Dempués de celebrase esti domingu'l Día Mundial del Mediu Ambiente, el miércoles día 8 ye'l Día Mundial de los océanos, una fecha que tien anguaño un significáu especial nun momentu en que la crisis del bocarte convirtió l'escosamientu de los bancos de pesca en titular de portada.

Al rau de los datos, agora yá oficiales, que falen de la desapaición d'esti recursu pesqueru y encamienten poner una veda que dure como poco d'equí a los dos años qu'entren, la organización Greenpeace ta acabante d'asoleyar un informe con motivu d'esti Día Mundial de los océanos en que da a conocer datos qu'esmolecen sobre l'estáu de les especies que más se pesquen nel mundu.

Ente les conclusiones del informe de Greeenpeace llama l'atención el fechu de que'l volume de pexe ente toles especies predadores ye'l 10% del qu'esistía enantes de la revolución industrial. Esa perda de masa piscícola nel mar aceleraríase dende va diez años p'acá acordies colos datos de Greenpeace, que diz que la producción pesquera vien menguando dende los años 90, lo que supón que los recursos de pexe, fonte fundamental de proteínes animales pa la especie humana, alcuéntrense énte una situación "crítica" al paecer de la organización ecoloxista, que tamién remembra que'l pescáu ye un recursu básicu pa delles de les poblaciones más probres del planeta mientres que'l comerciu internacional del pescáu beneficia mayormente a los países ricos.

El balance de Greenpeace pinta la situación prieta tamién pa otros representantes de la biodiversidá del mar, y denuncia que la situación actual ye la d'un procesu d'esfarraple mediuambiental que llevó yá a la despaición del 25% del coral y el 25% de los manglares. Les especies de crecimientu lentu son les que más tan acusando'l dañu, casu de toliñes y ballenes. La organización internacional denuncia que'l modelu de xestión pesquera demostró'l so fracasu tres de décades masimizando les captures pa furnir de pescáu a la industria nes que s'escaeció sistemáticamente'l papel del mediu ambiente acuáticu. Greenpeace cita'l casu del bocarte nel Cantábricu, asegurando que los científicos yá prendieren l'alarma nel añu 2001 mientres que los políticos siguieron negociando cuotes muncho más altes de les posibles. El resultáu agora son miles de pescadores ensin un recursu qu'esplotar y la dulda sobre la capacidá de recuperación d'esti caladeru. Greenpeace apunta a la merluza y al pixín como les siguientes especies na llista.