L'Intercélticu d'Avilés da anuncia de les sos actuaciones estrella

El Festival Intercélticu d'Avilés torna esti añu a ufiertar nel conceyu avilesín una amuesa de les cultures céltiques. Na edición d'anguaño rescamplen les actuaciones de Carlos Núñez, el grupu Galés Mabon y los asturianos Felpeyu.

El gaiteru gallegu Carlos Núñez va poco que visitó estes tierres, concretamente na Feria de l'ascensión d'anguaño onde actuó na plaza de la catedral d'Uviéu. Pal Festival Intercélticu d'Avilés vamos tener la oportunidá de ver otra vuelta la calidá técnica d'esti gaiteru qu'abrió'l camín comercial pa lo que vieno a llamase los "discos de gaiteros".

El programa, que va conociéndose adulces, tamién rescampla l'actuación de los galeses Mabon. El grupu formóse na seronda de 1998 y dende entós p'acá malpenes hebo cambios nos sos componentes y eso nótase na seguridá qu'amuesen nel escenariu. Mabon espeya na so música un compromisu claru pa col folclor tradicional galés, como podemos comprobar nos sos discos Lumps of Mabon, y el nuevu Ridiculous Thinkers. El grupu va actuar el día 30 de xunetu, el mesmu día que Carlos Núñez, y pa esti conciertu tán preparando una collaboración especial en dalgún de los temes del so repertoriu cola banda de gaites d'Avilés Esbardu.

Amás de les aportaciones foriates tamién tán confirmándose la presencia de grupos del país como ye'l casu de Felpeyu que va tocar el 23 de xunetu, o'l 25 de xunetu la Bandina'l Tombo, grupu que por cierto va dir esti añu al Festival Intercélticu de Lorient representando a Asturies.